Reksturinn sjálfur skilar afar litlu handbæru fé til að standa undir fjárhagsskuldbindingum til skemmri tíma, og hlutfall veltufjár frá rekstri af tekjum er langt undir markmiðum fjármálastefnu borgarinnar. Samkvæmt uppgjörinu nemur það aðeins 1,4%, en stefnt er að því að það sé yfir 7,5%.

Auk þess hafa skuldir og skuldbindingar borgarinnar aukist verulega frá áramótum og nema nú yfir 211 milljörðum króna. Þar af eru langtímaskuldir 137,5 milljarðar króna og lífeyrisskuldbindingar tæplega 39 milljarðar.

Þótt handbært fé hafi aukist um ríflega 2,5 milljarða á tímabilinu er ljóst af gögnum skýrslunnar að sú aukning stafar ekki af sterkum rekstri heldur einkum af lántöku og fjárhagslegum tilfærslum.

Reksturinn sem hér birtist gefur vísbendingar um að borgin reiði sig í vaxandi mæli á lántökur til að mæta fjárhagslegum skuldbindingum, frekar en að hefðbundinn rekstur skili nægjanlegu fé. Slík þróun er ekki sjálfbær til lengri tíma litið og undirstrikar nauðsyn þess að haldið sé aftur af útgjaldaaukningu og horft til raunhæfra lausna í fjármálum borgarinnar.