Sameining við Kviku gæti skapað öflugan banka

Í maí 2025 bárust tvær formlegar beiðnir um samrunaviðræður til stjórnar Kviku banka, annars vegar frá Íslandsbanka og hins vegar frá Arion banka.

Íslandsbanki sendi stjórnarformanni og bankastjóra Kviku banka bréf þar sem óskað var eftir að hafnar yrðu samrunaviðræður milli félaganna. Í bréfinu kemur fram að Íslandsbanki telji að sameining skapi fjölmörg tækifæri fyrir sameinaðan banka, hluthafa hans, viðskiptavini og fjármálakerfið í heild. Bankinn leggur til að viðræður um sameiningu byggist á markaðsvirði beggja félaga og býður 10% ofan á markaðsvirði Kviku við útreikning á skiptihlutföllum. Enn fremur er bankinn tilbúinn til að ræða fyrirkomulag sem gefi hluthöfum Kviku kost á að fá greitt með hlutabréfum og reiðufé.

Daginn áður hafði Arion banki sent sambærilega beiðni til stjórnar Kviku banka. Í tilkynningu Arion banka kemur fram að stjórn bankans telji að samruni félaganna myndi skila verulegum verðmætum til hluthafa beggja félaga. Sameining félaganna fæli í sér tækifæri til tekjuaukningar, áhættudreifingar, hagræðingar og lækkunar á fjármögnunarkostnaði. Arion banki leggur til að við ákvörðun skiptihlutfalls verði horft til markaðsverðs félaganna, eftir atvikum að teknu tilliti til gengisþróunar á tímabili sem stjórnir félaganna koma sér saman um.

Þó að bæði Íslandsbanki og Arion banki hafi áhuga á samruna við Kviku banka eru tilboðin ekki alveg sambærileg. Íslandsbanki býður 10% álag ofan á markaðsvirði Kviku, sem gæti verið aðlaðandi fyrir hluthafa Kviku. Arion banki hefur ekki opinberað slíkt álag í sínu tilboði. Þá hefur Íslandsbanki einnig lagt áherslu á að samrunaviðræður byggist á nýlegum upplýsingum og að áreiðanleikakönnun verði takmörkuð, þar sem bæði félögin eru skráð í Kauphöll og lúta upplýsingaskyldu.

Stjórn Kviku banka hefur staðfest móttöku beggja beiðna og mun taka þær til umræðu og ákveða næstu skref af hálfu bankans. Ekki hefur verið gefið út hvenær ákvörðun verður tekin.

Jón Guðni segir að mikil sóknarfæri felist í slíkri sameiningu. „Við sjáum mikla möguleika í sameiginlegum slagkrafti og að nýta styrkleika beggja banka. Íslandabanki og Kvika eru ólíkir bankar en passa vel saman. Í þessu felst líka aukin skilvirkni í allri starfsemi,“ segir hann.

Íslandsbanki sé með sterka stöðu meðal almennra viðskiptavina og lægri fjármögnunarkostnað, á meðan Kvika hafi byggt upp öfluga starfsemi í fjártækni og eignastýringu, bæði innanlands og erlendis, meðal annars í Bretlandi. Við gætum nýtt tæknilausnir þeirra betur, og sameinað persónulega þjónustu við stafræna framsækni.“

Bankarnir voru í sameiningarviðræðum 2023, en þeim var slitið. „Það hafði ekkert með áhugaleysi að gera – fólk sá strax mikil tækifæri,“ segir hann. Nú þegar Arion hefur einnig lagt fram formlegt tilboð á hendur Kviku segist Jón Guðni telja brýnt að bregðast hratt við.

Aðspurður hvers vegna Kvika ætti frekar að velja Íslandsbanka segir hann að sameiningin falli betur að menningu og framtíðarsýn beggja aðila. „Við teljum okkur passa betur saman og styrkleikar okkar fara betur saman. Það myndi leysast úr læðingi mikill kraftur í einingum eins og eignastýringu og aukinni þjónustu við viðskiptavini,“ segir hann og bendir á að fjárfestar hafi tekið vel í samrunaáform Íslandsbanka og Kviku – ekki síst þar sem tilboð bankans gerir ráð fyrir blöndu af reiðufé og hlutabréfum, sem eykur sveigjanleika og virði fyrir hluthafa.

Spurður út í vangaveltur um hvort ólík vinnustaðamenning hjá bönkunum kunni að vera hindrun segist Jón Guðni ekki sammála því.

„Við höfum framsækni sem eitt af okkar gildum og höfum fjárfest mikið í fjártækni. Það púslast vel saman. Það að tvinna saman tækni og persónulega þjónustu er beinlínis hluti af framtíðarsýn okkar.“

Hann segir að sameining myndi fela í sér veruleg samlegðaráhrif. „Rekstur banka er dýr, sérstaklega vegna tækni, eftirlits og kerfa. Það eru mikil tækifæri til samþættingar, meðal annars á sviði tölvukerfa og eignastýringar.“

Hann segist ekki geta tjáð sig um mögulega fækkun starfa hjá sameinuðum banka, en segir að það hafi verið skoðað og að frekara mat fari fram ef samrunaviðræður þróast áfram. Varðandi hugsanleg skilyrði Samkeppniseftirlitsins segir hann að enn sé of snemmt að segja til um hvað þau gætu falið í sér.

Spurður hvort Íslandsbanki hafi skoðað aðra möguleika á samruna innanlands, til dæmis við Skaga, sem jafnframt er móðurfélag tryggingafélagsins VÍS sem Íslandsbanki er í samstarfi við, kveðst Jón Guðni vera opinn fyrir valkostum.

„Við erum opin fyrir öllum valkostum, hvort sem er innanlands eða utan. Það þarf einfaldlega að skoða hvert tilvik út frá tækifærum.“

Í lokin nefnir hann að Íslandsbanki útiloki ekki frekari M&A-tækifæri erlendis. „Við erum að skoða möguleika, einkum á sviði eignastýringar og lánastarfsemi, þar sem við þekkjum vel til. En áhugi erlendra aðila á íslenskum markaði er enn lítill, markaðurinn er smár og krónan oft hindrun,“ segir hann.

Spurður hvernig rekstrarumhverfi banka horfi við honum um þessar mundir segist hann telja að það sé hagstætt umhverfi fram undan.

„Við sjáum hagvöxt, lítið atvinnuleysi og fjárfestingar í innviðum og landeldi. Þar að auki er skuldsetning heimila og fyrirtækja hófleg. Þetta er sterkt umhverfi fyrir banka,“ segir hann.

Lesa má viðtalið í heild sinni í ViðskiptaMogganum.