Herkvaðning áskorun fyrir banka

„Það er ein helsta áskorunin og ein af þeim sem lítil og meðalstór fyrirtæki standa frammi fyrir. Margir karlmenn hafa verið skráðir í herinn en jafnframt hefur nokkur fjöldi karlmanna yfirgefið landið, en sumir vilja komast hjá herþjónustu. Það er möguleiki fyrir kerfislega mikilvæg fyrirtæki að fá vernd gegn herkvaðningu. Bankar eru til dæmis á þessum lista. Við getum þó ekki verndað alla karla sem starfa hjá okkur þótt við vildum, enda er aðeins hægt að vernda allt að helming þeirra.“

Ashot Abrahamyan, bankastjóri Bank Lviv. Ljósmynd/Viktor Moskaliuk

Þannig að það eru takmarkanir á því hversu margir karlmenn frá fyrirtækinu þurfa að fara í herinn?

„Já. Ef það vinna til dæmis hundrað karlmenn í bankanum er aðeins hægt að vernda 50 þeirra. Hinir 50 gætu verið kallaðir í herinn.“

Reglur um forgang

Hver velur?

„Stjórn bankans hefur ákveðnar reglur um hverjir eru í forgangi. Það eru vanalega millistjórnendur og sérhæfðir sérfræðingar sem eru mikilvægir fyrir starfsemi bankans. Svo eru nokkrir starfsmenn sem við viljum auðvitað vernda en getum ekki. Til dæmis höfum við í nokkrum tilfellum þurft að finna önnur störf fyrir starfsmenn vegna þess að þau fyrirtæki gátu veitt þeim þessa vernd.

Almennt er skortur á sérhæfðu fólki, ekki síst í hefðbundnum karlastörfum, en það skortir fólk til að vinna störf sem hafa aðallega verið unnin af körlum. Þar má nefna bílstjóra ökutækja, landbúnaðartækja og almenningsvagna. En fyrirtækin eru að reyna að finna leiðir. Þau koma með frumlegar hugmyndir: taka yngra fólk og þjálfa það, þjálfa fólk sem er eldra en 60 ára, þjálfa konur til að læra að vinna þessi störf eða finna aðrar leiðir til að halda rekstrinum gangandi. Það er áskorun fyrir alla,“ segir Abrahamyan.

Ítarlega var rætt við hann og þrjá aðra lykilstjórnendur Bank Lviv í síðasta ViðskiptaMogga.