Einar ráðinn framkvæmdastjóri SVEIT

Stjórn SVEIT, samtaka fyrirtækja á veitingamarkaði, hefur ráðið Einar Bárðarson í stöðu framkvæmdastjóra samtakanna. Hann tekur formlega við starfinu 1. júní næstkomandi af Aðalgeiri Ásvaldssyni, sem hefur gegnt embættinu frá stofnun samtakanna árið 2021. 

Þetta kemur fram í tilkynningu frá SVEIT en Aðalgeir tilkynnti um brotthvarf sitt í vor og í kjölfarið var hafin leit að nýjum framkvæmdastjóra.

Einar Bárðarson er með MBA-gráðu frá Háskólanum í Reykjavík og býr yfir víðtækri reynslu af stjórnun og stefnumótun. Hann gegndi síðast starfi framkvæmdastjóra Votlendissjóðsins, en hefur einnig starfað sem sjálfstæður ráðgjafi í stjórnunar- og markaðsmálum um árabil. 

Meðal verkefna hans síðustu ár eru stjórnarformennska Tónlistarmiðstöðvar Íslands og ráðgjöf fyrir Klúbb matreiðslumeistara og Íslenska kokkalandsliðið.

SVEIT eru hagsmunasamtök fyrirtækja á veitingamarkaði og starfa að því að gæta hagsmuna félagsmanna gagnvart stjórnvöldum, efla fagmennsku innan greinarinnar og miðla upplýsingum um málefni veitingageirans.

• Blogga um frétt