Trump gagnrýnir bæði Powell og Walmart

Peningastefnunefnd seðlabankans ákvað fyrr í mánuðinum að halda stýrivöxtum óbreyttum, en vextir hafa ekki verið lækkaðir síðan í desember á síðasta ári og eru nú á bilinu 4,25 til 4,5%.

Walmart „éti tollana“

Trump beindi líka spjótum sínum að Walmart um helgina, en verslanakeðjurisinn varaði við því í síðustu viku að verð á ýmsum neytendavörum kynni að fara hækkandi vegna tollastefnu Trumps. Lét Doug McMillon, forstjóri Walmart, hafa eftir sér að jafnvel þó að Kína og Bandaríkin hefðu samið um að lækka gagnkvæma ofurtolla þá myndi engu að síður vera óhjákvæmilegt að hækka vöruverð. Sagði McMillon að vöruverð gæti byrjað að hækka strax í þessum mánuði.

Í samfélagsmiðlafærslu sagði Trump að Walmart ætti að taka á sig kostnaðinn af tollunum, eða „éta tollana“ eins og forsetinn orðaði það. Trump sagði jafnframt að Walmart hefði hagnast um milljarða dala í fyrra en með því gaf hann í skyn að félagið gæti ráðið við þennan viðbótarkostnað frekar en að velta honum yfir á viðskiptavini sína. „Ég mun fylgjast með, og það munu viðskiptavinir ykkar gera líka,“ sagði hann.

Scott Bessent, fjármálaráðherra Bandaríkjanna, fylgdi þessu eftir í viðtali hjá sjónvarpsstöðinni NBC á sunnudag þar sem hann kvaðst hafa átt samtal við McMilllon og að Walmart myndi taka á sig hluta af þeim verðhækkunum sem annars hefðu orðið vegna tollahækkana Trumps. Lét Bessent fljóta með að það sem skipti viðskiptavini Walmart mestu máli væri að eldsneytisverð hefði hríðlækkað frá því Trump komst til valda.