Lyfjuappið valið verkefni og stafræn lausn ársins

Lyfjuappið var valið verkefni ársins og stafræn lausn ársins á Íslensku vefverðlaununum sem afhent voru við hátíðlega athöfn í Hafnarhúsinu við Tryggvagötu á föstudag. Þá hreppti Hugsmiðjan þrenn verðlaun og vefur 14islands tvenn. 

Þetta kemur fram í tilkynningu frá Íslensku vefverðlaununum.

Hugsmiðjan hreppti þrenn verðlaun. Ljósmynd/Aðsend

Mikil fjölgun félagsmanna

Fimmtíu vefir eða stafrænar lausnir voru tilnefnd til Íslensku vefverðlaunanna en þau eru hluti af Degi vefiðnaðarins, sem Samtök vefiðnaðarins standa fyrir, og er uppskeruhátíð vefiðnaðarins á Íslandi. 

„Dagur vefiðnaðarins fór fram úr okkar björtustu vonum. Þetta var stærsta og fjölmennasta verðlaunahátíð í sögu samtakanna - enda var öllu til tjaldað. Kórónuveiran hafði mikil áhrif á störf samtakanna en nú eru þau að vakna úr dvala. Það hefur orðið mikil fjölgun félagsmanna enda eru samtökin fyrir alla sem vinna í og hafa áhuga á stafrænni þróun og vegferð,“ er haft eftir Bryndísi Alexandersdóttur, stjórnarkonu í Samtökum vefiðnaðarins, í tilkynningunni.

Fimmtíu vefir eða stafrænar lausnir voru tilnefnd. Ljósmynd/Aðsend

Heiðursverðlaun veitt í fyrsta skipti

Heiðursverðlaun Samtaka vefiðnaðarins voru veitt í fyrsta skipti á föstudag, en þau eru veitt einstaklingum sem hafa lagt sitt af mörkum í þágu vefiðnaðarins í gegnum tíðina. Komu verðlaunin í hlut Möggu Dóru Ragnarsdóttur, stafræns leiðtoga hjá Mennskri ráðgjöf. 

„Magga Dóra þykir fyrirmynd annarra kvenna í vefiðnaðinum og hefur án efa orðið til þess að fleiri konur en bara þær sem læra forritun leita í tæknigeirann. Hún hefur um langt skeið verið þekkt fyrir óbilandi innblástur á sviði notendamiðaðra tæknilausna,“ segir meðal annars í umsögn dómnefndar um Möggu Dóru.

Í tilkynninguinni kemur fram að i þakkarræðu sinni hafi Magga Dóra minnst á mikilvægi þess að hafa notandann alltaf í fyrirrúmi í allri hönnun og þróun. 

Magga Dóra hlaut heiðursverðlaunin. Ljósmynd/Aðsend

Hér má sjá lista yfir verðlaunahafa á Íslensku vefverðlaununum:

• Verkefni ársins: Lyfjuappið. Framleiðendur: Apparatus, Vettvangur og Lyfja
• Hönnun og viðmót: 14islands.com. Framleiðendur: 14islands
• Fyrirtækjavefur ársins (lítil fyrirtæki): 14islands.com. Framleiðendur: 14islands
• Fyrirtækjavefur ársins (meðalstór fyrirtæki): Ný vefsíða Júní - juni.is. Framleiðandi: Júní
• Fyrirtækjavefur ársins (stór fyrirtæki): Alþjóðlegur vefur EFLU https://www.efla-engineers.com/. Framleiðandi: Hugsmiðjan og Efla
• Markaðsvefur ársins: Önnu Jónu Son https://onnujonuson.com. Framleiðandi: Aristide Benoist, Robbin Cenijn, Haraldur Þorleifsson
• Söluvefur ársins: Vefsala Bláa Lónsins https://www.bluelagoon.com/. Framleiðandi: Bláa Lónið, Aranja og Ataraxia
• Opinber vefur ársins: Myndlistarmiðstöð / Icelandic Art Center https://www.icelandicartcenter.is/. Framleiðendur: Hugsmiðjan, Myndlistarmiðstöð og Studio Studio
• Efnis- og fréttaveita: Annar áfangi BHM.is https://www.bhm.is/. Framleiðandi: BHM og Hugsmiðjan
• Stafræn lausn ársins: Lyfjuappið https://www.lyfja.is/thjonusta/lyfju-appid/. Framleiðandi: Apparatus, Vettvangur og Lyfja
• APP ársins: Noona appið. Framleiðendur: Noona Labs
• Samfélagsvefur ársins: Umferðin.is. Framleiðandi: Kolofon, Greipur Gíslason & Vegagerðin
• Gæluverkefni ársins: alexharri.com. Framleiðandi: Alex Harri

• Blogga um frétt