Ísland vann og spilar um Forsetabikarinn

U21-árs landslið Íslands í handknattleik karla vann öruggan sigur á Póllandi, 38:32, í leik um 17. - 20. sæti á HM 2025 í Katowice í Póllandi í dag.

Með sigrinum tryggði Ísland sér sæti í úrslitaleik um Forsetabikarinn, þar sem leikið verður um 17. til 18. sæti, gegn Alsír eða Serbíu.

Jafnræði var með liðunum í fyrri hálfleik enda leikar jafnir, 18:18, að honum loknum.

Í síðari hálfleik sigldi íslenska liðið fram úr og tryggði sér góðan sex marka sigur.

Elmar Erlingsson átti enn einn stórleikinn fyrir Ísland en hann var markahæstur í leiknum með 11 mörk.

Össur Haraldsson bætti við átta mörkum og Skarphéðinn Ívar Einarsson skoraði fimm.

Uppfært:
Serbía verður mótherji Íslands í leiknum um Forsetabikarinn.

• Blogga um frétt