Chelsea er Sambandsdeildarmeistari

Chelsea er Sambandsdeildarmeistari eftir sigur á Real Betis frá Spáni, 4:1, í úrslitaleik liðanna í Wroclaw í Póllandi í kvöld. 

Real Betis var betri aðilinn í fyrri hálfleik og kom Abde Ezzazouli liðinu yfir á níundu mínútu. 

Í seinni hálfleik setti Chelsea hins vegar í annan gír og Enzo Fernández jafnaði metin á 65. mínútu. Fimm mínútum síðar kom Nicolas Jackson Chelsea yfir, 2:1, en Cole Palmer lagði bæði mörk upp með glæsibrag. 

Jadon Sancho bætti við þriðja marki Chelsea og Moises Caicedo því fjórða undir lok leiks. 

Nicolas Jackson kom Chelsea yfir. AFP/John MacDougall

Þetta var fjórða ár Sambandsdeildarinnar en Roma vann fyrsta árið, West Ham annað, Olympiacos þriðja og loks Chelsea núna. 

Þá var Víkingur úr Reykjavík með í keppninni í ár og komst í umspil um sæti í 16-liða úrslitunum en tapaði fyrir Panathinaikos. Breiðablik var þá fyrsta íslenska liðið til að komast í riðla- eða deildarkeppni í Evrópukeppni með því að spila í Sambandsdeildinni haustið 2023. 

• Blogga um frétt