Varpa ljósi á framtíð Amorims hjá United

Ruben Amorim verður ekki sagt upp störfum sem knattspyrnustjóra Manchester United, þrátt fyrir dapurt gengi liðsins á tímabilinu.

Það er Sky Sports sem greinir frá þessu en Amorim, sem er fertugur, tók við stjórnartaumunum hjá United í nóvember á síðasta ári eftir að Hollendingnum Erik ten Hag var sagt upp störfum.

Frétt af mbl.is

Amorim hótaði að hætta störfum hjá United

Árangur liðsins undir stjórn Portúgalans hefur ekki verið upp á marga fiska en liðið tapaði fyrir Tottenham, 1:0, í úrslitaleik Evrópudeildarinnar í Bilbao í vikunni.

Þá er liðið sem stendur í 16. sæti ensku úrvalsdeildarinnar og getur ekki endað ofar en í 14. sætinu þegar einni umferð er ólokið.

United leikur ekki í Evrópukeppni á næstu leiktíð og því gæti reynst erfitt fyrir forráðamenn félagsins að sannfæra stærstu bitana á félagaskiptamarkaðnum um að ganga til liðs við félagið í sumar.

• Blogga um frétt