Það er í eðli okkar karlmanna

KR fékk stóran skell gegn Val, 6:1, í Bestu deild karla í fótbolta í kvöld. KR er aðeins einu stigi fyrir ofan fallsæti og lítið hefur gengið í undanförnum leikjum. Þrátt fyrir það hefur Óskar Hrafn Þorvaldsson þjálfari liðsins ekki áhyggjur af stöðunni.

Frétt af mbl.is

Valur valtaði yfir KR-inga

„Ég hef ekki áhyggjur af stöðunni því það er mikið eftir. Ef það væri einn leikur eftir væri ég aðeins farinn að hugsa minn gang. Á meðan það eru 15 leikir eftir og sé ákveðna hluti sem eru að þróast vel hef ég ekki áhyggjur. Núna er ég með óbragð í munninum og reyna að láta þetta ekki stjórna skapinu mínu.“

Óskar gaf í skyn í fyrri hluta viðtalsins, sem var birt á mbl.is fyrr í kvöld, að hans menn hafi gefist upp.

„Það er í lagi að svona hlutir gerist einu sinni. Það er í eðli okkar karlmanna að vera ekki sterkir þegar á móti blæs. Við höfum tilhneigingu til að fara auðveldu leiðina og sleppa vel frá hlutunum.

Þegar hlutirnir verða erfiðir höfum við tilhneigingu til að fara í felur. Með því að búa til sterka liðsheild er mögulegt að koma í veg fyrir að þetta komi fyrir aftur. Menn eru meðvitaðir um að þeir köstuðu inn hvíta handklæðinu. Ég yrði hissa ef það gerist aftur á þessu tímabili. Mikilvægast er að menn læri af þessu,“ sagði Óskar.

• Blogga um frétt