Það var heldur betur glatt á hjalla þegar Valhöll fasteignasala fagnaði 30 ára afmæli sínu síðastliðinn föstudag. Um 200 manns mættu í afmælisveisluna sem var haldin í glæsilegum húsakynnum Valhallar í Síðumúla 27.

Meðal gesta voru athafnamennirnir Ásgeir Kolbeinsson og Jón Gunnar Geirdal, sem ásamt fleirum gæddu sér á gómsætum veitingum og fljótandi veigum.

„Það var mjög gaman að taka á móti öllum þessum góðu afmælisgestum og finna að fólk hugsi svona hlýtt til Valhallar á þessum skemmtilegu tímamótum. Það stendur mikið til á afmælisárinu og við nýir eigendur ákváðum að halda myndarlega afmælisveislu ásamt því að vinna að ýmsum spennandi breytingum á rekstri Valhallar, þar á meðal kynningu á nýju lógói Valhallar og nýrri og glæsilegri heimasíðu.

Vonandi falla breytingarnar viðskiptavinum Valhallar vel í geð og við getum látið sól fyrirtækisins skína sem aldrei fyrr,“ segir Óskar H. Bjarnasen fasteignasali og annar eigandi Valhallar.

„Valhöll var fljót að stimpla sig inn á íslenskan fasteignasölumarkað“ 

Valhöll fasteignasala var stofnuð af þeim Ingólfi Geir Gissurarsyni og Bárði Tryggvasyni í febrúar 1995. Faðir Ingólfs, Ásmundur Ólafsson, stakk upp á því að fasteignasalan yrði nefnd Valhöll en hann var mikill áhugamaður um goðafræði. Fyrstu þrjú árin hafði Valhöll aðsetur í Mörkinni 3 í Reykjavík en árið 1998 fluttist starfsemin í glæsilegt skrifstofuhúsnæði í Síðumúla 27 og hefur verið þar til húsa fram á daginn í dag.

Valhöll var fljót að stimpla sig inn á íslenskan fasteignasölumarkað og fjölgaði starfsfólkinu og verkefnunum jafnt og þétt. Valhöll var áberandi í sölu nýbygginga og mátti sjá fána með merki Valhallar blakta hátt á hinum ýmsu byggingarsvæðum víðs vegar á höfuðborgarsvæðinu.

Þann 1. mars 2023 urðu mikil vatnaskil í rekstri Valhallar en þá tóku fasteignasalarnir og lögfræðingarnir Snorri Björn Sturluson og Óskar H. Bjarnasen við rekstrinum. Ingólfur starfar þó áfram með nýjum eigendum ásamt öðru öflugu starfsfólki fasteignasölunnar sem margt hefur unnið þar í áraraðir.