Smartland Mörtu Maríu | Heimili og hönnun | Morgunblaðið | 25.5.2025 | 18:00

Mikil eftirspurn eftir 150-250 milljóna sérbýlum

Kjartan býr í Fossvogi og þekkir vel til í hverfinu þótt hann sé ekki alinn þar upp. Morgunblaðið/Karítas Sveina Guðjónsdóttir

Kjartan byrjaði að starfa sem fasteignasali árið 1995 og útskrifaðist sem löggiltur fasteignasali árið 2000. Þessi 30 ára reynsla hefur kennt honum að heiðarleg samskipti borgi sig alltaf og líka það að reyna að ráðleggja fólki eftir bestu vitund.

Hvernig metur þú fasteignamarkaðinn akkúrat núna?

„Ég met það svo að það sé bjart fram undan á markaði. Það hefur verið góð velta undanfarið með notaðar eignir og nýbyggingamarkaðurinn er að taka við sér. Við hjá Eignamiðlun höfum selt um 100 íbúðir í nýbyggingum frá áramótum og erum með fjölbreytt úrval af nýbyggingum í sölu. Ég á því ekki von á öðru en að sumarið verði gott í sölu á öllum eignum. En óskandi væri að vaxtastigið lækkaði frekar og forsendur greiðslumats hjá einstaklingum yrðu færðar aftur til fyrra horfs er kemur að hlutfalli ráðstöfunartekna,“ segir Kjartan.

Hvaða hverfi eru vinsælust?

„Það er auðvitað breytilegt eftir framboðinu hverju sinni, sem og stemmingu á markaði. En í þau ár sem ég hef unnið við fasteignasölu eru Seltjarnarnesið, Vesturbærinn, Miðbærinn, Fossvogur og Garðabær alltaf vinsæl. Hugsanlega er það af því að framboðið á eignum í þessum hverfum er takmarkað en hlutfallslega meira framboð er á eignum í hverfum eins og Grafarvogi, Kópavogi og Hafnarfirði.“

Er einhver sérstök tegund af eignum vinsæl akkúrat núna?

„Það er mikil eftirspurn eftir hagstæðum íbúðum fyrir fyrstu kaupendur, sem og sérbýlum á verðbilinu 150-250 milljónir. En það orsakast af því að framboðið er takmarkað. En svo vantar alltaf góðar eignir á markaðinn,“ segir Kjartan.

Tom Podmore/Unsplash

Er betra að selja fyrst og kaupa svo?

„Það styrkir alltaf stöðu þína sem kaupandi ef þú ert búin að selja, þar sem þú getur fækkað fyrirvörunum. En það eru auðvitað ekki allir í aðstöðu til þess. Meira er um það að fólk kaupi með fyrirvara um sölu og í flestum tilfellum gengur það upp. Ég ráðlegg fólki sem er í virkri leit að vera búið að láta skoða, meta og mynda eignina sína. Það getur þá farið hratt inn á markaðinn ef spennandi eign kemur í sölu.“

Þú ert þekktur fyrir að vera sérstakur sérfræðingur í Fossvoginum í 108 Reykjavík. Ertu alinn upp í hverfinu eða hvernig æxlaðist þetta?

„Þegar ég byrjaði í fasteignasölu var ég að vinna með þremur mönnum sem bjuggu allir í Fossvoginum. Við vorum því að selja þó nokkuð í gegnum þau tengsl. Síðan flutti ég sjálfur í Fossvoginn árið 2007 og hef selt mikið í hverfinu síðan. Sjálfur er ég úr Vesturbænum og konan mín úr Laugarásnum. Það er því engin tenging við hverfið úr æsku.“

Hvernig hefur fasteignamarkaðurinn breyst á þeim 30 árum sem þú hefur starfað í faginu?

„Það hafa orðið gríðarlegar breytingar á þessum 30 árum. Þegar ég byrjaði voru engir fasteignavefir eða aðrar leitarvélar. Aðeins var auglýst í blöðum, tekin var ein ljósmynd af eigninni, seljendur sýndu eignirnar sjálfir og aðeins var ein lánastofnun á markaði. En stóra breytingin var þegar mbl.is reið á vaðið með fasteignavefinn árið 1998,“ segir Kjartan.

Fasteignasali er oft eins og sáttasemjari eða sálfræðingur, gerir þú eitthvað sérstakt til þess að reyna að miðla málum?

„Það sem ég geri er að hlusta á fólk áður en ég reyni að miðla málum. Oftast náum við að leysa úr þeim ágreiningsefnum sem uppi eru og klára afsal. Lykilatriðið er að funda með fólki og hlusta.“

Hvernig safnaðir þú þér fyrir fyrstu íbúð þinni?

„Ég seldi bíl og fékk lánsveð hjá móður minni,“ segir Kjartan sem festi kaup á íbúð við Hringbraut 99 og kostaði 4,1 milljón á þeim tíma. Bíllinn sem hann seldi var Benz-fornbíll.

Ertu með einhver góð fyrir þá sem eru að reyna að koma sér inn á fasteignamarkaðinn?

„Það er mikilvægt að kenna börnunum okkar að spara og leggja fyrir. Fermingarpeningar, útskriftarpeningar, sumarvinnan og svo framvegis. Þetta safnast þegar saman kemur og getur munað öllu að hafa þetta eigið fé. Það hefur alltaf verið erfitt að komast inn á fasteignamarkaðinn. Allur sparnaður skiptir máli en auðvitað hafa ekki allir tök á því að leggja fyrir. Þess vegna skiptir það líka máli að í boði séu gagnsæ úrræði eins og hlutdeildarlán til þess að hjálpa fólki af stað.“