Jenna Huld Eysteinsdóttir, húðlæknir á Húðlæknastöðinni og Húðvaktinni, svarar spurningum lesenda Smartlands. Hér fær hún spurningu frá 19 ára gamalli stúlku sem er að kljást við hormónabólur.

Hæ hæ

Ég er 19 ára og fæ hormónabólur alltaf á sama tíma í tíðahringnum. Þær koma í kringum munninn og stundum á kinnarnar. Ertu með einhver ráð við því?

Kveðja, 

HGG

Sæl og blessuð. 

Bólur myndast vegna þriggja meginvandamála:

1. Hormónaóregla
2. Of mikil olíuframleiðsla í húðinni og þ.a.l. stífur og fílapenslar
3. Bólgumyndun og graftarbólumyndun vegna baktería sem sýkja stíflaða kirtla.

Ef við tökum fyrir fyrsta liðinn, sem virðist vera undirliggjandi vandamálið hjá þér, þar sem þú finnur mikil tengsl við blæðingar, þá myndi hjálpa þér verulega að fara á samsettu getnaðarvarnarpilluna, t.d. Drovelis eða Yasmin, til að jafna hormónin þín. Vel hægt að ræða það við heimilislækninn þinn við tækifæri.

Ef við vindum okkur svo í lið tvö, sem fjallar um of mikla olíuframleiðslu í húðinni þá myndi retinól eða A-vítamínkrem hjálpa verulega. Þú getur keypt retinól án lyfseðils, t.d. frá SkinCeuticals og Pharmaceris, og athugað hvort það dugi ekki til. Ef það dugar ekki til þá þarf eitthvað sterkara A-vítamínkrem, eins og t.d. Differin-gel, sem minnkar olíuframleiðsluna og stíflurnar. Yfirleitt duga þessi ráð til að meðhöndla vægan og meðalslæman bólusjúkdóm en ef þessi ráð duga ekki til þá þarf að leita til húðlæknis og fá sterkari lyf.

Til að ná sem bestum árangri í bólumeðferð er mikilvægt að hugsa vel um húðina, nota réttar húðvörur og fylgja leiðbeiningum um lyf. Þar myndi ég segja mikilvægast að nota salicylsýruhreinsi á morgnana til að hreinsa húðina en það er fituleysanleg sýra sem hreinsar vel stíflur í húðinni.

Endilega kynntu þér hvernig er best að hugsa um bólukennda húð og hvaða vörur er gott að nota hér á heimasíðu Húðvaktarinnar. 

Ég mæli einnig með bóluþáttum Húðkastsins til að fá enn dýpri þekkingu.

Kær kveðja, 

Jenna Huld Eysteinsdóttir, húðlæknir á Húðlæknastöðinni og Húðvaktinni. 

Liggur þér eitthvað á hjarta? Þú getur sent Jennu Huld spurningu HÉR.

Tengdar fréttir

Spurðu húðlækninn

Af hverju er svona erfitt að losna við svepp?

• Hvaða krem hentar fyrir 16 ára stúlku?
• Er hægt að losna við „reykingahrukkur“?
• Getur ljósagríma hjálpað rósroðahúð?
• Er í lagi að nota einnota andlitsmaska?

» Fleiri tengdar fréttir

• Blogga um frétt