Ein­ar Hugi Bjarna­son, lögmaður á Lög­fræðistofu Reykja­vík­ur, svar­ar spurn­ing­um les­enda Smart­lands. Hér fær hann spurn­ingu frá manni sem veltir fyrir sér hvernig hann geti gefið börnunum sínum hlut í fyrirtækinu sínu. 

Góðan dag

Ég er 66 ára karlmaður sem á vel rekið fyrirtæki með mikla veltu og eignir. Nú er ég farinn að huga að efri árum. Ég á tvö börn sem einnig vinna í fyrirtækinu. Mig langar að láta börnin mín eiga hlut í fyrirtækinu. Hvaða leiðir eru í boði? Ef ég læt þetta sem fyrirfram greiddan arf hvernig reiknast erfðafjárskattur af hlut í fyrirtæki?

Með fyrir fram þökkum,

GHJ

Góðan dag,

Börnin eru skylduerfingjar þínir ásamt maka ef þið hafið gengið í hjónaband. Samkvæmt því munu börnin, að óbreyttu, erfa hlut í fyrirtækinu að þér látnum.

Þú hefur einnig þann kost að ráðstafa hlutum í fyrirtækinu til barna þinna með fyrirframgreiddum arfi. Undir þessum kringumstæðum er nauðsynlegt að skila til sýslumanns erfðafjárskýrslu og greiða 10% erfðafjárskatt af hinum fyrirframgreidda arfi. Þetta síðastnefnda er afar þýðingarmikið, enda yrði ella litið svo á að um gjöf væri að ræða sem skattlögð yrði sem tekjur sem er töluvert hærri en erfðafjárskattur.

Erfðafjárskattur greiðist aðeins af þeirri fjárhæð sem er umfram skattfrelsismörk og njóta erfingjar skattfrelsis í hlutfalli við arf sinn. Skattstofn erfðafjárskatts vegna hlutafjár í óskráðum félögum miðast við gangverð þeirra í viðskiptum, annars bókfært verð eigin fjár samkvæmt síðasta endurskoðaða ársreikningi eða árshlutareikningi viðkomandi félags að viðbættum áunnum óefnislegum verðmætum sem metin eru til fjár og gefa af sér arð í framtíðinni en óheimilt er lögum samkvæmt að færa til bókar.

Bestu kveðjur,

Einar Hugi Bjarnason, hæstaréttarlögmaður.

Liggur þér eitthvað á hjarta? Þú getur sent Einari Huga og öðrum lögmönnum á Lögfræðistofu Reykjavíkur spurningu HÉR. 

Tengdar fréttir

Spurðu lögmanninn

Mega fjölmiðlar skrifa um auð einstaklinga?

• Má leigja út íbúð foreldris sem er á hjúkrunarheimili?
• Hvað verður um eignir hins látna ef viðkomandi var í sambúð?
• Má móðir sem situr í óskiptu búi eyða eins og enginn sé morgundagurinn?
• Má ganga að launum vegna smálána?

» Fleiri tengdar fréttir

• Blogga um frétt