Matur | mbl | 27.5.2025 | 21:00 | Uppfært 28.5.2025 9:37

„Stórasta“ kokteilahátíð Íslands haldin í Stykkishólmi í sumar

Þeir veitingastaðir og ölstofur áí Stykkishólmi sem taka þátt eru eftirfarandi. Narfeyrarstofa, Fosshótel Stykkishólmur, Sjávarpakkhúsið, Hótel Egilsen og Skipper. Samsett mynd

„Stórasta“ kokteilhátíð Íslands, sem ber líka enska heitið Stykkishólmur Cocktail Week, verður haldin í sumar og er þetta í fyrsta skiptið sem hátíðin stendur yfir í viku en ekki yfir eina helgi. Hátíðin fer fram dagana 16. júní til 22. júní næstkomandi og verður öllu tjaldað til að því fram kemur í tilkynningu frá Barþjónaklúbbi Íslands.

„Við erum að tala um einstaka upplifun á einum fallegasta stað Íslands. Ætlunin er að standa fyrir hátíð sem sameinar Hólmara, gesti og fagfólk í þessum bransa,“ segir Teitur Riddermann Schiöth, forseti Barþjónaklúbbs Íslands.

Teitur Riddermann Schiöth er forseti Barþjónaklúbbs Íslands. Ljósmynd/Aðsend

Hátíðin er haldin af veitingahúsum og ölstofum í Stykkishólmi ásamt Barþjónaklúbbi Íslands.Meðan á hátíðinni stendur verða sérútbúnir SCW kokteilaseðlar í boði á stöðunum sem taka þátt. Staðirnir munu einnig bjóða upp á fjölda viðburða tengda hátíðinni sem eru öllum opnir.

Staðirnir sem taka þátt eru eftirfarandi:

Narfeyrarstofa
Fosshótel Stykkishólmur
Sjávarpakkhúsið
Hótel Egilsen
Skipper

„Stærsti viðburður hátíðarinnar fer fram á sunnudaginn 22. júní næstkomandi þar sem leitin að besta kokteilnum í Hólminum hefst. Einnig fer fram einstaklingskeppnin „Stykkihólmur Cocktail Week Open“ - Hanastél í Hólminum þar sem sigurvegarinn hlýtur eftirsóttan titil - Meistari Meistaranna í Hólminum,“ segir Teitur að lokum sem er farinn að hlakka mikið til hátíðarinnar.