Innlent | mbl | 26.6.2025 | 13:44

Landsréttur sýknar Pál af kröfum Aðalsteins

Páll Vilhjálmsson og Aðalsteinn Kjartansson. Samsett mynd

Landsréttur sýknaði í dag Pál Vilhjálmsson, pistlahöfund og fyrrverandi blaðamann, af kröfum Aðalsteins Kjartanssonar, blaðamanns á Heimildinni, um ómerkingu fjölmargra ummæla og greiðslu miskabóta vegna færslna sem birtust á bloggsíðu Páls á tímabilinu frá apríl 2022 til apríl 2023.

Þetta kemur fram í dómi Landsréttar sem féll í dag, en Héraðsdómur Reykjavíkur hafði áður dæmt ummæli Páls ómerk.

Í færslunum fullyrti Páll meðal annars að Aðalsteinn hefði átt aðild að byrlun og þjófnaði á síma Páls Steingrímssonar skipstjóra í tengslum við umfjöllun um fyrirtækið Samherja. Hefur þetta mál verið kallað byrlunarmálið.

Aðalsteinn krafðist ómerkingar ummælanna og 450 þúsund króna í miskabætur, sem hann fékk í héraði. Páll áfrýjaði þeim dómi til Landsréttar sem hefur nú dæmt honum í vil.

Frétt af mbl.is

Páll áfrýjar meiðyrðamáli Aðalsteins

Tjáningarfrelsið verji hann

Landsréttur komst að þeirri niðurstöðu að þótt ummæli Páls væru beinskeytt og óvægin yrði að líta til þess að Aðalsteinn hefði á þeim tíma haft stöðu sakbornings hjá lögreglu vegna rannsóknar á mögulegri aðild að brotum gegn friðhelgi einkalífs.

Þá hefði umræðan varðað málefni sem almenningur hefði ríkra hagsmuna að fá upplýsingar um og Páll notið verndar tjáningarfrelsis við skrif sín.

Í dómnum segir að Páll hafi mátt vera í góðri trú um að tilefni hefði verið til þeirra fullyrðinga sem hann lét falla og að þær hefðu ekki gengið svo langt að réttlæta ætti inngrip í tjáningarfrelsi hans. Var hann því sýknaður af öllum kröfum Aðalsteins, bæði um ómerkingu og miskabætur.

Málskostnaður fellur niður á báðum dómstigum.

Á síðasta ári sneri Landsréttur einnig við dómi héraðsdóms og sýknaði Pál í meiðyrðamáli sem Þórður Snær Júlíusson, framkvæmdastjóri þingflokks Samfylkingarinnar, og Arnar Þór Ingólfsson blaðamaður höfðuðu gegn Páli.