Innlent | Morgunblaðið | 11.6.2025 | 6:20 | Uppfært 8:33

Varnartengd útgjöld aukin hægt

„Það er heill hellingur af útgjöldum sem við berum nú þegar og fallið geta undir varnartengd útgjöld,“ segir forsætisráðherra í samtali við Morgunblaðið. mbl.is/Eyþór

Kristrún Frostadóttir forsætisráðherra segir að varnartengd útgjöld á Íslandi verði ekki aukin í einu vetfangi, en miðað sé við að þau nái um 1,5% af landsframleiðslu árið 2032, mögulega 2035.

Hún undirstrikar að það séu ekki hernaðarútgjöld, enda Ísland herlaust land og staðfestur skilningur á því meðal bandamanna Íslands í Atlantshafsbandalaginu (NATO).

Það eru eftir sem áður um 70 milljarðar króna á ári sem stendur, en ekki komið á hreint í hvað þeim fjármunum yrði varið.

Horft til Landhelgisgæslunnar

„Það er heill hellingur af útgjöldum sem við berum nú þegar og fallið geta undir varnartengd útgjöld,“ segir forsætisráðherra í samtali við Morgunblaðið.

„Til dæmis innviðafjárfesting, þættir með tvíhliða notagildi eins og hafnarmannvirki, vegaframkvæmdir, flugvellir, netöryggismál og viðbúnaður við fjölþátta ógnum,“ nefnir Kristrún um slíkt. Hún tekur fram að ekkert sé klappað og klárt, en sumt séu fjárfestingar sem ráðist hefði verið í óháð þessu.

„Það er margt sem við erum að gera hér heima, sem gæti fallið þarna undir, og margt sem við þurfum að gera til þess að treysta varnir landsins og gæti fallið þarna undir.“

Hún staðfestir að þar sé m.a. horft til Landhelgisgæslunnar.

„Ég held að það þurfi að styrkja Landhelgisgæsluna. Það hefur alltaf verið mín skoðun og er ennþá mín skoðun.“