„Þið eruð fólkið á Íslandi“

Ævintýrablær er yfir móttökuhúsinu hjá hjónunum. mbl.isÁsdís

Leitin að draumastaðnum

„Allt byrjaði þetta með skipulagðri ferð til Íslands árið 2016 þar sem við fórum aðallega gullna hringinn með eldra fólki,“ segir Stefan og brosir.

„Við fengum svo tvo frjálsa daga og fórum á Snæfellsnes á bílaleigubíl. Þá kolféllum við fyrir landinu. Þegar við fórum svo næst að skipuleggja frí urðum við að koma hingað aftur og fórum svo að koma trekk í trekk. Eftir átta eða níu Íslandsferðir datt okkur í hug að taka algjöra u-beygju í okkar lífi. Þegar covid kom missti Stefan vinnu sína en hann var viðburðastjóri hjá bjórfyrirtæki og allt í einu voru engir viðburðir,“ segir Isabelle.

„Ég sagði þá við Isabelle að við ættum að fara til Íslands,“ segir Stefan, en Isabelle var þá fasteignasali.

„Planið var að fara til Íslands eftir fimm ár en vegna covid varð sú bið styttri. Við seldum húsið okkar og allt sem við áttum og byrjuðum hér að nýju,“ segir Isabelle, en húsið í Fljótsdal fundu þau á netinu.

Smáhýsin eru afar smart og falla vel inn í landslagið. Von er á fleiri smáhýsum á næstunni. mbl.isÁsdís

„Við leituðum í tvö ár á netinu að hinum fullkomna stað og komum til Íslands að skoða. Þessi staður var í uppáhaldi og var í góðu ástandi,“ segir Isabelle, en á lóðinni voru tvö hús og í öðru eru þrjár íbúðir fyrir ferðamenn. Auk þess hafa þau byggt þrjá bústaði sem allir eru hugsaðir fyrir tvo.

„Við fengum arkitekt í Austurríki til að setja upp teikningarnar okkar að smáhýsunum sem við sjálf höfðum hannað. Við byrjuðum strax að byggja þau árið 2022,“ segir Stefan, en þess má geta að þegar þau eru ekki að vinna við ferðamennsku eru þau að rækta upp skóginn. Í fyrra plöntuðu þau rúmlega fjögur þúsund trjám.

Fullbókuð fyrsta sumarið

„Við gerðum mjög mikið sjálf og undirbjuggum grunnana en húsin komu í pörtum í gámum frá Sviss. En allt sem er smíðað innandyra gerði Stefan sjálfur,“ segir Isabelle og nefnir að þau hafi ekki haft reynslu af ferðamannaiðnaði. Stefan hafði reyndar kennt túristum bæði á skíði og bretti í Sviss.

Eftir opnun á Hengifosslodge fóru ferðamenn að streyma til þeirra, þeim að óvörum. Hjónin hafa haft í nógu að snúast þessi þrjú ár og eru bæði í fullu starfi við að reka fyrirtækið.

„Við vissum ekkert hvernig viðtökurnar yrðu og héldum kannski að við myndum fá svona tíu til fimmtán gesti til að byrja með, en fyrsta sumarið vorum við alveg fullbókuð með þessar þrjár íbúðir,“ segir Isabelle. Þau hjónin sáu fyrsta sumarið sjálf um allt utanumhald auk þess að smáhýsin komu frá Sviss. Það var því nóg að gera.

„Um veturinn kláruðum við smáhýsin að innan og gátum byrjað að leigja þau út um vorið,“ segir Stefan. Opið er hjá þeim nánast allt árið með hléi yfir háveturinn, þó með undantekningu yfir jólin en þá er opið. Von er á fleiri smáhýsum á land þeirra á næstunni en landið nær langt upp í hlíðar og út í mitt Lagarfljót og er 416 hektarar alls. Þar af eru hundrað hektarar skógi vaxnir. Bærinn stendur hátt uppi í hlíðum og útsýnið yfir fljótið og skógivaxið landið er guðdómlegt.

„Við heilsum upp á orminn daglega,“ segir Stefan og hlær.

Það er örlítll útlenskur blær í loftinu þegar maður keyrir að Hengifosslodge sem er umkringt háum trjám. mbl.isÁsdís

Í vinsælum sjónvarpsþætti

Ég frétti að þið væruð fræg í Sviss vegna einhvers sjónvarpsþáttar. Segið mér frá því!

„Já, einmitt! Það er klikkun,“ segir Stefan.

„Það var þannig að þegar við vorum að hugsa um að flytja til Íslands vissum við ekkert hvað myndi gerast eða hvort það myndi yfirhöfuð ganga upp. Í Sviss er sjónvarpsþáttur, mjög vinsæll og frægur, þar sem þremur pörum eða fjölskyldum sem eru að flytja til nýrra landa er fylgt eftir. Við vorum valin í þáttinn ásamt fólki sem var að flytja til Majorka og Flórída. Við vorum kvikmynduð við flutningana milli landanna og síðan komu þau hingað fimm sinnum til að fylgjast með lífi okkar hér. Þessir þættir, sem voru sex talsins, eru alltaf sýndir í janúar og febrúar á besta tíma og um tvær milljónir manna horfa,“ segir Isabelle og bætir við að á hverju ári komi ný sería. Þetta var í fysta sinn sem fylgst var með fólki flytja til Íslands á þeim fimmtán árum sem þátturinn hefur verið í framleiðslu. Þátturinn með Isabelle og Stefan var einn sá vinsælasti frá upphafi, enda segja þau Ísland mjög vinsælt meðal Svisslendinga.

„Okkar þættir voru teknir upp 2023 og sýndir ári síðar, árið 2024. Líklega kemur tökuliðið aftur eftir nokkur ár til að sjá hvernig allt hefur gengið og það verður svo sýnt síðar,“ segir Stefan.

„Ferðamönnum frá Sviss hefur fjölgað um 20% síðan þátturinn fór í loftið og þegar ferjan kom síðasta sumar mættu hingað svissneskir ferðamenn úr tíu eða fimmtán bílum bara til að heilsa upp á okkur og skoða sig um,“ segir hann og brosir.

„Í nóvember vorum við í Sviss og fólk kannaðist við okkur í búðum. Fólk stoppaði okkur oft og sagði: „Þið eruð fólkið á Íslandi!“ Þetta var mjög skrítið,“ segir hann.

„Í apríl vorum við að versla hér í Nettó og sáum þá konu sem brosti breitt til okkar. Ég kannaðist ekkert við hana en svo kom í ljós að hún þekkti okkur úr þáttunum, tveimur árum síðar!“ segir Isabelle.

„Við erum alltaf að hitta fólk sem segist lengi hafa ætlað til Íslands en loks látið verða að því eftir að það sá þáttinn með okkur. Hingað hefur líka komið fólk frá svissneskum ferðaskrifstofum sem vilja vinna með okkur og senda kúnna til okkar,“ segir hún, en ljóst er að sjónvarpsþátturinn hefur vakið áhuga Svisslendinga á Íslandi.

Þið eruð þá að hjálpa íslensku hagkerfi með því að laða til ykkar ferðamenn?

„Já, á þetta svæði,“ segir Stefan.

Sá Nonna og Manna

Og þið elskið Ísland alltaf jafn mikið?

„Já, hvað er ekki að elska! Á hverjum morgni vakna ég og drekk kaffið mitt í kyrrð og ró með útsýni yfir Lagarfljótið. Það er alveg stórkostlegt,“ segir Isabelle.

Spurð hvort veturnir hafi verið erfiðir svarar hún:

„Nei, veturnir hafa ekkert truflað okkur. Í fyrsta sinn í fyrravetur fannst mér skammdegið smá erfitt, en Stefan finnur ekkert fyrir því. En það gekk yfir á þremur vikum,“ segir hún.

Í frítíma sínum fer Isabelle gjarnan á hestbak, en hún hefur haft áhuga á hestum frá barnsaldri. Bæði segja þau að áhuginn á Íslandi hafi kviknað strax í barnæsku.

„Ég hef verið á hestbaki frá því að ég var lítil stelpa. Sjónvarpsþátturinn íslenski, Nonni og Manni, var í sjónvarpinu og ég held að það hafi kveikt ást mína á Íslandi strax þá. Stefan hafði alltaf brennandi áhuga á eldfjöllum sem barn,“ segir Isabelle.

„Sviss er fallegt land og verður alltaf okkar heimili en hér höfum við meira pláss. Í Sviss er allt of mikið af fólki á litlu landsvæði og þar er fólk uppteknara. Fólk hérna er líka upptekið en samt afslappaðra,“ segir hún og Stefan tekur undir það.

„Ef maður horfir yfir vatn í Sviss er þar krökkt af bátum. Hér horfum við yfir fljótið og það eru engir bátar!“ segir Stefan og brosir breitt.