Halldóra Fríða Þorvaldsdóttir, starfandi bæjarstjóri í Reykjanesbæ, segir sorglegt að núverandi ríkisstjórn falli frá ákvörðun fyrrum mennta- og barnamálaráðherra um löngu tímabæra uppbyggingu á Fjölbrautarskóla Suðurnesja. Reykjanesbær, Suðurnesjabær og sveitarfélagið Vogar hafi verið búin að staðfesta sinn 40% hlut í kostnaði uppbyggingarinnar.

Í umfjöllun mbl.is fyrir helgi sagði Stefán Vagn Stef­áns­son, þingmaður Fram­sókn­ar, í sam­tali við mbl.is að rík­is­stjórn­in hef­ði í þriðju fjár­auka­lög­um sín­um ákveðið að hætta við fjár­mögn­un sem búið var að tryggja á þessu ári til að ráðast í stækk­un fjög­urra verk­náms­skóla.

„Þetta er algjörlega blaut tuska í andlitið og við verðum að gera betur,“ segir Halldóra í samtali við mbl.is.

Frétt af mbl.is

Samningarnir komnir í uppnám

Minnsta sem hægt er að gera að láta vita

Á fyrri hluta síðasta árs voru und­ir­ritaðir samn­ing­ar við fjölda sveit­ar­fé­laga til að stækka Mennta­skól­ann á Ísaf­irði, Fjöl­brauta­skóla Norður­lands vestra, Verk­mennta­skól­ann á Ak­ur­eyr­i og Fjöl­brauta­skóla Suður­nesja til að mæta mik­illi eft­ir­spurn í verk- og starfs­nám.

Eins og áður segir hefur ríkisstjórnin hætt við þessa fjármögnun og segir Halldóra engan hafa verið látinn vita og sjálf hefði hún komist að ákvörðuninni við að lesa umfjöllun í fjölmiðlum.

Spurð álits á ummælum Heim­is Más Pét­urs­sonar, fram­kvæmda­stjóra og upp­lýs­inga­full­trúa þing­flokks Flokks fólks­ins, sem benti á það að fjár­magn­inu hefði verið „hliðrað til næsta árs“ og að „ekki standi til að draga úr því að fram­kvæmd­ir færu af stað,“ segir Halldóra að það hefði verið ágætt að láta, í það minnsta, skólaráðið vita af ákvörðuninni.

„Það er verulega undarlegt að það sé verið að taka svona ofboðslega stórar ákvarðanir og láta engan vita,“ segir hún.

„Ef svona ákvarðanir eru teknar á þessum stöðum þá er fullkomlega eðlilegt að láta sveitarstjórnir og stjórnendur skólanna vita af þeim ákvörðunum. Við vorum hér Reykjanesbær, Suðurnesjabær og Vogar, búin að samþykkja að greiða 40% af uppbyggingunni.

Þannig að Reykjanesbær hefði greitt um 80% af þessari upphæð sem eru um 400 milljónir, og það minnsta sem hægt er að gera er að láta okkur vita. Þetta hefur líka áhrif á okkar áætlanir.“

Þarfagreiningin unnin árið 2019

Halldóra minnir á að þarfagreining hefði verið unnin fyrir Fjölbrautaskólann á Suðurnesjum árið 2019 og henni skilað árið 2020. Þar hafi komið fram að þörf fyrir húsnæði fyrir verknámsaðstöðuna væri um 2.000 fermetrar. Á þeim tíma hefðu deildirnar verið á víð og dreif – eins og þær eru enn þá í dag – og verið í alls 930 fermetrum, „þannig að það var strax ljóst að það væri mikil þörf á því að gera betur“.

„Þá kom einnig fram að fermetrafjöldi ætti að vera 15 fermetrar á nemanda en væri töluvert undir því. Þarfagreiningin sýndi það sem við vitum,“ segir Halldóra.

Síðast var byggt við Fjölbrautarskólann á Suðurnesjum árið 2004 og var íbúafjöldi á Suðurnesjum þá 17.000 manns. Núna er íbúafjöldinn, bara í Reykjanesbæ einum, 24.500 og á Suðurnesjum um 32.000 manns. „Þannig að íbúafjöldi á svæðinu hefur tvöfaldast en skólinn hefur ekkert stækkað, ekki um fermetra“.

Segir hún bæinn hafa bent á þetta lengi og því hafi íbúar verið ofboðslega bjartsýnir þegar fyrrum mennta- og barnamálaráðherra var tilbúinn að leggja af stað í þessa vegferð, að byggja við skólann.

„Það var skrifað undir það í apríl í fyrra, eins og víða á landinu, að stækka skólann um allt að 1.900 fermetra, sem þó nægir ekki fyrir þessa þarfagreiningu sem var gerð fyrir fimm árum síðan.“

„Þetta er komið í algjört óefni“

„Við gengum svo langt að funda með embættismönnum í ráðuneytinu og leggja til að steypa upp aðra hæð á húsið sem stóð til að byggja, til þess að hafa hana þá allavega tilbúna,“ segir Halldóra. Það sé ódýrara að steypa þriðju hæðina, þó hún verði ekki kláruð, og geta innréttað hana eftir því sem fjármagn fæst, „af því að við vitum að það er svo mikil þörf“.

Á skólalóðinni eru svokallaðar lausar stofur, nokkurs konar gámaeiningar, sem hafa verið nýttar sem færanlegar einingar.

Segir Halldóra málið vera komið í svo mikið óefni að húsasmíðabrautin – sem smíðar alltaf sumarbústað og selur upp í efniskostnað – hefði ekki getað selt sumarbústaðinn sem var byggður síðast af því að skólinn hefði þurft að nýta hann sem kennslustofu.

„Þannig að þetta er komið í algjört óefni.“

Tekur hún fram að skólinn sé mjög vel rekinn miðað við það fjármagn sem hann fái, en hann sé verr fjármagnaður en aðrir sambærilegir skólar. Fjármagnið sem Fjölbrautarskóli Suðurnesja fái fyrir hvern nemanda sé 700.000 krónum lægra en Fjölbrautarskóli Suðurlands.

„Við höfum ekki fengið neina eðlilega skýringu á þeim mun. Það er eitthvað sem væri verulega áhugavert að reyna að fá einhverjar betri skýringar á.“

Tengdar fréttir

Alþingi

„Við sögðumst ekki ætla að gera það svona hratt“

• Þingfundir í júlí mögulegir
• Sló í brýnu í þingsal
• Ósýnilegum sjúkdómi gefin rödd
• Nýtt bankaráð Seðlabankans kosið á Alþingi

» Fleiri tengdar fréttir

• Blogga um frétt