Innlent | mbl | 4.6.2025 | 16:00

„Nógu há eru launin“

Halla Gunnarsdóttir vill að launahækkanir embættismanna fylgi almennum kjarasamningum og segir ekki hugað að neinni hófsemd, ekki heldur hjá seðlabankastjóra sem þó lesi sauðsvörtum pupulnum pistilinn um bruðl. Ljósmynd/Aðsend BIG

„Margir voru glaðir þegar kjararáð var lagt niður, en þá kom bara reikningsformúla í staðinn,“ segir Halla Gunnarsdóttir, formaður stéttarfélagsins VR, í samtali við mbl.is, innt eftir skoðun sinni á 5,6 prósenta hækkun þingfararkaups og annarra launa æðstu embættismanna ríkisins sem gildi tekur um komandi mánaðamót.

Frétt af mbl.is

Launin fylgi almennum launahækkunum

Ritaði Halla um hækkunina á Facebook-síðu sína í gær eins og mbl.is fjallaði um þá síðdegis, en í pistli Höllu mátti meðal annars lesa eftirfarandi:

Á sama tíma þarf almennt launafólk að sætta sig við 3,5% launahækkun á grundvelli kjarasamninga sem áttu að fela í sér einhvers konar sameiginlega ábyrgð, við værum jafnvel öll um borð í sama báti. En það erum við ekki, frekar en fyrri daginn.

Frétt af mbl.is

Launahækkun í vasa þingmanna og ráðherra

Bendir hún á það í því samtali við mbl.is, sem hér segir af, að launahækkanir embættismanna séu sjálfvirkar óháð því hvað gangi á í þjóðfélaginu.

Kvittar ekki upp á verðbólgukenningar

„Kjarasamningar, sem undirritaðir voru á almennum vinnumarkaði, gerðu ráð fyrir hóflegum launahækkunum, sem byggir að vísu á kenningum sem ég kvitta ekki upp á – um að launahækkanir hafi einhver voðaleg áhrif á verðbólguna. Það breytir því ekki að á meðan allt almennt launafólk undirgengst þetta hækka kjörnir fulltrúar meira,“ heldur Halla áfram og þetta hreyfi við fólki.

Hvaða skilaboð senda stjórnvöld út í þjóðfélagið með þessu fyrirkomulagi?

„Þetta er náttúrulega bundið í lög sem Alþingi setti sjálft,“ svarar formaðurinn, „mér finnst allt í lagi að spyrja hvort ekki sé eðlilegra að laun æðstu ráðamanna taki breytingum samhliða hækkunum í kjarasamningum.“

Frétt af mbl.is

Gagnrýnir launahækkanir æðstu ráðamanna

Ekki farið illa með þennan hóp

Æðstu embættismenn þurfi almennt ekki að berjast fyrir sínum kjörum eins og venjulegt launafólk heldur fljóti einhvern veginn ofan á baráttu annarra. „Mér finnst alveg mega velta þessu upp. Nógu há eru launin, þannig að jafnvel þótt eitthvert launaskrið yrði og þau hækkuðu ekki í takt við það væri ekki verið að fara gríðarlega illa með þennan hóp fólks,“ segir Halla og gerir umvandanir seðlabankastjóra að sínu lokayrkisefni í viðtalinu.

„Laun seðlabankastjóra – sem gerir ekki annað en að móralisera yfir venjulegu fólki og reyna að taka peninga úr umferð með því að kreista heimilishaldið hjá því – taka líka hækkunum eftir þessu, þar er ekki verið að huga að neinni hófsemd,“ segir Halla Gunnarsdóttir VR-formaður að lokum.