Sú yngsta sem les veðurfréttir á RÚV

Katrín Agla er veðurfræðingur á vakt hjá Veðurstofu Íslands. Hún segir alla veðurfréttamenn á RÚV vera verktaka. Hún hafi byrjað að lesa veðurfréttir eftir að fólkið sem sér um þær nálgaðist hana í gegnum Veðurstofuna. „Þau spurðu hvort ég vildi vera með í hópnum,“ segir hún. Katrín er yngsti veðurfræðingurinn hjá Veðurstofu Íslands en það gæti breyst bráðlega: „Það er ein stelpa sem er yngri en ég sem er í veðurfræðinámi núna sem við vitum af. Vonandi kemur hún til okkar á vaktina,“ segir Katrín Agla.

Gaman að spá góðu veðri

Aðspurð hvort fólk beini óánægju sinni til veðurfréttamanna þegar góð spá rætist ekki segist Katrín Agla ekki hafa fundið fyrir því á eigin skinni. „En það getur alveg gerst. Ég er náttúrulega búin að vera svo stutt, ég byrjaði í veðurfréttunum í apríl, en kannski kemur að því seinna meir. En maður veit alveg að oft getur fólk orðið svolítið frústrerað við veðurfræðinga og veðrið almennt á Íslandi. Við erum þjóð sem er mjög háð veðrinu og fólk vill að það sé gott veður hérna, sem er ekki alltaf.“

„En það er alltaf gaman að geta spáð góðu veðri,“ bætir hún við.

Spennandi á Íslandi

Katrín Agla segir það klárlega meira spennandi að vera veðurfræðingur á Íslandi en í landi þar sem veðrið er alltaf eins. „Við fáum rosalega miklar breytingar í veðri og miklar sviptingar. Á einum degi getur verið stórhríð og svo sól og blíða. Það er gaman að fá svona fjölbreytt veður og það er aðeins flóknara en ef veðrið væri eins allan daginn.“

Katrín Agla hefur alltaf verið heilluð af veðrinu. „Kannski meira í seinni tíð en í barnæsku samt.“ Áhuginn á veðurfræði kviknaði svo fyrir alvöru þegar hún lærði eðlisfræði í Háskóla Íslands. „Ég var ekkert endilega að stefna á að verða veðurfræðingur, en áhuginn kviknaði þar,“ segir Katrín. Eftir BS-gráðuna í eðlisfræði hélt Katrín í Stokkhólmsháskóla þar sem hún fór í meistaranám í veðurfræði en Háskóli Íslands býður ekki upp á nám í því. „Það er ekki hægt að taka meistaranám í veðurfræði á Íslandi. En það er hægt að taka grunnnám í jarðeðlisfræði, þá tekur maður nokkra veðurfræðikúrsa,“ útskýrir Katrín Agla.

Hvetur ungt fólk í veðurfræði

„Mig langar að hvetja ungt fólk sem hefur áhuga á raunvísindum að fara í veðurfræðinám,“ segir Katrín Agla. „Þetta er rosalega skemmtilegt og gagnlegt nám og mikil atvinnutækifæri í þessu. Það eru ekkert rosalega margir sem fara í veðurfræðinám í dag. Ef einhver er að hugsa um eðlisfræðinám eða verkfræðinám, kíkið á veðurfræði.“