Ryskingar milli mótmælenda (Myndskeið)

Til ryskinga kom milli nokkura mótmælenda á Austurvelli í dag þar sem tvær andstæðar fylkingar mættust, önnur fylkingin mótmælti opnum landamærum en hin fylkingin var á vegum No Borders á Íslandi.

Þegar fyrsti ræðumaður á vegum Ísland þvert á flokka sem mótmælti opnum landamærum hóf mál sitt reyndu aðgerðarsinnar á vegum No Borders að kaffæra ræðuhöldum með sírenum og gjallarhornshrópum. Reyndu þá aðrir mótmælendur að skerast í leikinn og stöðva sírenuvæl aðgerðasinnanna.

Stympingarnar leystust fljótt upp, en aðgerðarsinnar No Borders héldu uppteknum hætti á meðan mótmælunum stóð. Þó nokkur fjöldi var saman á mótmælunum og báru margir þeirra Íslenska fána.

Höfðu hætt við að mæta

Fram kom í fréttum í gær að No Borders hyggðust ekki ætla að mæta til fundarins í dag, eftir að samtökin héldu því fram að hvatt hefði verið til ofbeldis gegn þeim á fundinum. 

Samtökin höfðu einnig lýst því yfir að mót­mæl­in þeirra yrðu færð yfir á Ing­ólf­s­torg af öryggisástæðum. 

Mótmælin að mestu friðsöm

Þrátt fyrir að lítill hluti mótmælenda hafi tekist á, voru mótmælin að mestu leyti friðsöm.

Meðal þeirra sem ávörpuðu fundinn voru Brynjar Barkarson, meðlimur raftónlistartvíeykisins Club Dub. 

Í ræðu sinni fór hann yfir víðan völl, en hann lýsti meðal annars áhyggjum sínum af opnum landamærum sem og slæmum samfélagslegum afleiðingum þess að taka á móti miklum fjölda flóttafólks frá ólíkum menningarsamfélögum.    

Hvatti hann einnig til þess að fólk léti í sér heyra og að stjórnmálamenn á Íslandi sýndu meiri kjark til þess að bregðast við þróuninni. 

Mótmælendur á Austurvelli Olafur Ardal

• 1 blogg um fréttina

Bloggað um fréttina

• Jóhann Elíasson: MISHEPPNAÐ UPPHLAUP HJÁ "NO BORDER-LIÐINU"............