Innlent | Morgunblaðið | 31.5.2025 | 22:08 | Uppfært 1.6.2025 16:21

Aukin umsvif kalla á uppbyggingu

Mikil uppbygging hefur átt sér stað á vellinum. Flugstöðin var stækkuð og þota EasyJet sést hér í hlaði. mbl.is/Þorgeir Baldursson

„Aukin umsvif í fluginu og meiri umferð hér um völlinn kalla eðlilega á frekari uppbyggingu hér,“ segir Hermann Jóhannesson, nýr umdæmisstjóri Isavia á Norðurlandi. Hann tekur formlega við því starfi 1. júlí næstkomandi en er mættur og byrjaður að setja sig inn í mál. Hermann er iðnaðar- og rekstrarverkfræðingur, en vélaverkfræðingur í grunninn og kemur til starfa nú frá Legó í Danmörku.

Á Akureyrarflugvelli er líflegt frá morgni til kvölds. Áætlunarvél Icelandair – sú fyrsta á deginum – lendir rétt fyrir klukkan átta á morgnana, en alls eru fjórar ferðir og stundum fleiri á áætlun dagsins hjá félaginu. Norlandair er líka með mikla starfsemi á svæðinu. Flýgur frá Akureyri til Vopnafjarðar og Þórshafnar. Þá eru Grímsey og Nerlerit Inaat, sem er nærri Scoresby-sundi á Grænlandi, ekki langt undan og tíðar ferðir þangað. Sömuleiðis er Akureyri heimahöfn sjúkraflugs sem Norlandair hefur með höndum samkvæmt samningum við stjórnvöld. Þeir sem sjúkrafluginu sinna eru á sólarhringsvakt. Oft þarf að bregðast skjótt við, eins og Akureyringar þekkja vel þegar flugvélagnýr heyrist að nóttu.

Hermann Jóhannesson til vinstri hér á útkíkki. Með honum er Björn Grétar Baldursson sem þarna var flugumferðarstjórinn á vakt. mbl.is/Sigurður Bogi

Tenging við útlönd

Nokkur erlend flugfélög fljúga í dag til og frá Akureyri og þar kemur til árangur af markaðsstarfi síðustu ára. Má tiltaka að hollenska flugfélagið Voigt Travel flýgur milli Amsterdam og Akureyrar einu sinni til tvisvar í viku. Breska félagið EasyJet flýgur yfir veturinn frá Lundúnum og Manchester til Akureyrar og svissneska félagið Edelweiss er í reglulegum ferðum frá og til Zürich. Þúsundir ferðamanna nýta sér þessar ferðir og tengingin við útlönd er mikilvæg fyrir ferðaþjónustuna á Norðurlandi.

„Starfsemin hér á vellinum er viðamikil. Starfsmenn Isavia hér eru alls um 60. Verkefni þess eru fjölbreytt, svo sem flugumferðarstjórn, öryggisleit og fleira. Þá er Icelandair hér með fjölmennan hóp starfsfólks svo og Norlandair. Þyrluþjónustan er vaxandi og Flugsafn Íslands er eftirtektarvert.“

Viðbragðsgeta styrkist

Til stendur að ein af þremur þyrlum Landhelgisgæslunnar verði í framtíðinni staðsett á Akureyri. Þetta kom fram í máli Kristrúnar Frostadóttur forsætisráðherra sem í síðustu viku hélt morgunfund á flugvellinum, þá nýkomin með flugi frá Reykjavík til Akureyrar, á leið áfram til Vopnafjarðar. Kom fram í máli ráðherrans að samþykkt hefði verið af hálfu stjórnvalda aukin fjárveiting til Gæslunnar svo úthald þyrlu og áhafna fyrir norðan gæti verið mögulegt. Greint hefur verið frá því að stjórnendur Landhelgisgæslu séu nú að skoða frekari útfærslu þessa.

Ráðherrarnir Kristrún Frostadóttir og Logi Einarsson hér á Akureyrarvelli við vél Norlandair sem þau flugu með til Vopnafjarðar. mbl.is/Sigurður Bogi

„Ég fagna því að þyrla verði staðsett hér. Slíkt eykur öryggi og alla viðbragðsgetu hér, til dæmis úti á hafinu. Þá er sennilegt að þyrlu hér fylgi að bæta þurfi ýmsa aðstöðu hér á flugvellinum og því þurfa þá að fylgja fjárveitingar frá hinu opinbera,“ segir Hermann Jóhannesson að síðustu.