Gera aðeins upp hluta af „launaþjófnaðinum“

Norðurþing metur kostnað vegna vangreiddra launa til slökkviliðsmanna um 16,5 milljónir króna. Trúnaðarmaður slökkviliðsins segir að „launaþjófnaðurinn“ sé meiri, en sveitarfélagið ætli aðeins að leiðrétta vangreiðslur sem ná til fimm ára þó að fyrir liggi að þær nái til allt að tólf ára.

Sveitarstjóra Norðurþings hefur einnig verið falið að vinna að tillögum um endurskipulagningu á starfsemi Slökkviliðs Norðurþings.

Greint var frá því í síðustu viku að Ágúst Sigurður Óskarsson, trúnaðarmaður slökkviliðsins, segði slökkviliðsstjóra Norðurþings um að hafa vangreitt starfsmönnum laun yfir margra ára tímabil.

Frétt af mbl.is

Laun vangreidd um langt árabil

Ágúst sagði að launaþjófnaður Norðurþings hafi numið um 70 milljónum króna; þar af hafi um 35 milljónir þegar verið innheimtar, en hinar 35 milljónirnar séu vegna vangreiðslu á launum árin 2012-2020 sem sveitarfélagið neiti að leiðrétta og beri fyrir sig fyrningu launa.

En í bókun frá fundi byggðarráðs Norðurþings á fimmtudag kom fram að kostnaður sveitarfélagsins vegna leiðréttinga á launum slökkviliðsmanna nemi „samtals 16.480.539 kr. og þar af nemur leiðrétting á boðtækjagreiðslum 9.904.004 kr.“

Ágúst bendir á í því samhengi að sveitarfélagið vilji aðeins greiða vangreiðslur frá árunum 2020-2024, en ekki fyrir vangreiðslur sem nái lengra aftur í tímann, allt að 12 ár.

Að sögn Ágústs eru boðtækjagreiðslurnar heldur ekki í samræmi við ársreikning slökkviliðsins. Samkvæmt ársskýrslu séu 60 starfsmenn, um 50 hverra eigi að fá boðtækjagreiðslur upp á samtals um 360 þúsund fyrir sl. 5 ár, sem myndi gera hátt í 18 milljónir króna.

Enginn ágreiningur um upphæðir fyrr en nú.

„Við höfum átt um 25 fundi með stjórnendum Norðurþings um þetta mál og á þeim síðasta fórum við yfir upphæðir og ekki var neinn ágreiningur um þær,“ segir Ágúst sem bendir þó á að hann hafi ekki aðgang að sjálfu launakerfi Norðurþings.

Aðrir hlutar meinta launaþjófnaðarins varða m.a. skráningu vinnustunda, starfsmannafunda og æfinga, og einnig ranga röðun í launaflokka, vangreidd námskeið, vangreiddan vinnutíma við þrekpróf og læknisskoðanir, vangreiddan vinnutíma á bakvöktum, vanrækslu við að hækka laun í samræmi við breytingar á kjarasamningi og starfsmati og vanrækslu á læknisskoðunum starfsmanna.

Þá eigi m.a. eftir að leiðrétta laun og greiða fyrir vinnu. Einnig sé í skoðun hvort heimilt sé að greiða þar lægri bakvaktarlaun en annars staðar í stofnunum ríkis og sveitarfélaga á Íslandi en að sögn Ágústs hafa starfsmenn á Kópaskeri og Raufarhöfn fengið 200-300 krónur á tímann fyrir að vera á bakvakt á meðan kollegar þeirra annars staðar fá 1.200-1.500 krónur.

Sveitarstjóri tjáir sig ekki

Ágúst segir enn fremur að starfsmenn hafi kvartað yfir launum og starfskjörum í mörg ár og þeir sem hafi staðið í öndvegi hafi þurft að þola smán frá stjórnsýslu og byggðaráði.

„Til að byrja með hafnaði sveitarstjóri öllum kröfum, þrátt fyrir skýr kjarasamningsbrot. Eftir að hópur okkar fór á fund stjórnsýslunnar fór loksins eitthvað að gerast. Við höfum átt um 25 fundi á síðustu 17 mánuðum, sveitarstjóri og stjórnsýslan hafa tafið úrvinnslu og samstarf eins og þeim er lífsins mögulegt,“ segir Ágúst að lokum.

Katrín Sigurjónsdóttir sveitarstjóri vildi ekki tjá sig um málið þegar mbl.is ræddi við hana í dag.

Í bókun kemur enn fremur fram að rekstrarkostnaður hlutastarfandi slökkviliðsmanna hafi stóraukist frá því að 14. kafli í kjarasamningi LSS og SÍS hafi verið felldur úr gildi 2022.

Þá segir enn fremur að byggðarráð feli sveitarstjóra að vinna að „tillögum um endurskipulagningu á starfsemi Slökkviliðs Norðurþings“ en jafnframt er sveitarstjóra falið að kanna hvort vilji sé til samstarfs hjá nágrannasveitarfélögum um samrekstur slökkviliða á stærra svæði.

• Blogga um frétt