Að sögn sjónarvotta kom einn maður alblóðugur út um glugga í kjallara. Samkvæmt upplýsingum frá Slökkviliðinu á höfuðborgarsvæðinu voru þrír fluttir á spítala. 

Fjórir slökkviliðsbílar voru á svæðinu, sex sjúkrabílar komu á svæðið og þrír þeirra fóru með slasaða á spítala. Minnst 10 lögreglubílar og lögregluhjól eru í útkallinu. Íbúar stóðu fyrir utan og fylgdust með aðgerðum auk þess sem lögregla tók skýrslu af þeim. 

Aðgerðum er við það að ljúka og slökkviliðið er að ganga frá búnaði sínum.  

„Við vitum ekki af hverju þessi sprenging stafar. Það er búið að slökkva allan eld á jarðhæðinni og verið er að reykræsta stigagang. Einnig er hugað að íbúum sem þarna búa. Þrír voru fluttir af vettvangi á sjúkrahús. Nú er verið að huga að næstu skrefum og skoða hvort þurfi að huga að öðrum íbúðum í stigagangnum vegna reyks,“ segir Jón Viðar Matthíasson, slökkviliðsstjóri hjá Slökkviliðinu á höfuðborgarsvæðinu.