Lúxusgisting á Gaddstaðaey

Ásamt hóteli er fyrirhugað að vera með 40 lítil gestahús til útleigu á eynni. Gestahúsin munu tengjast rekstri hótelsins.

„Hótelið og starfsemin öll kemur til með að njóta sérstöðu í ferðamannaiðnaðinum á Íslandi vegna staðsetningar í/við laxveiðiá,“ segir í skipulagslýsingu.

Stefnt sé að því að hótelið verði í samræmi við umhverfi, landslag og sögulegar skírskotanir. Boðið verði upp á gistiaðstöðu í hæsta gæðaflokki.

Aðkoma verður um Gaddstaðaveg, nýjan veg af honum og nýja brú sem gerð verður út í eyna yfir Ytri-Rangá.

Eyjan er algróin og rennsli Ytri-Rangár, sem er lindá, er stöðugt og flóðahætta því lítil, segir í skipulagslýsingu. Skipulagssvæðið er skilgreint sem mikilvægt fuglaverndunarsvæði eins og nær allt Suðurlandsundirlendið.

Fer í umhverfismat

Aðalskipulagsbreytingin fellur undir lög um umhverfismat framkvæmda og áætlana.

Meta skal líkleg áhrif af fyrirhuguðum framkvæmdum og starfsemi á aðliggjandi svæði og einstaka þætti áætlunarinnar sjálfrar, eftir því sem við á.

Skipulagslýsing, sem unnin er af verkfræðistofunni Eflu, er birt á skipulagsgatt.is. Þar getur almenningur kynnt sér áformin á Gaddstaðaeyju og sent inn athugasemdir. Þá verður óskað eftir umsögnum ýmissa stofnana.

Athugasemdafrestur er til og með 31. maí nk.