Skylt að veita aðgang að hljóð- og myndupptökum

Til að skera úr ágreiningi

Spurningu um hvort þetta eigi við um þau ökutæki sem eru með slíkan búnað innbyggðan, eða hvort krafist sé að tryggingartakar komi upp slíkum búnaði í bílum sínum, segir Hildur Björk að þetta eigi aðeins við um búnað sem til staðar sé í bifreiðum, en engin krafa gerð um að bæta við slíkum búnaði í ökutæki.

Markmiðið með ákvæðinu sé að hafa heimild í skilmála svo unnt sé að nýta gögn úr tækjabúnaði ökutækja til þess að komast að réttri niðurstöðu í tjónamálum, t.d. þegar ágreiningur sé um hvað gerst hafi.

Þá segir í svarinu að ákvæðið eigi við um atburði þar sem tjón hefur orðið, en ekki væri óskað upplýsinga um annað, enda hefði VÍS ekki hagsmuni af slíku. Fram kemur að í persónuverndarstefnu VÍS komi fram að þær persónuupplýsingar sem VÍS vinni úr séu nýttar í samræmi við tilgang vinnslunnar, t.d. til þess að leysa úr ágreiningi við afgreiðslu tjóna.

Samkvæmt persónuverndarlögum

Spurningu um hvernig tryggingartakar geti treyst því að VÍS fari leynt með persónulegar upplýsingar tryggingartaka sem fram kunni að koma á hljóð- eða myndupptökum, svarar Hildur Björk þannig að fyrirtækið beri ábyrgð á vinnslu og meðferð persónuupplýsinga sem unnið sé með í starfsemi félagsins og teljist því ábyrgðaraðili samkvæmt lögum um persónuvernd. VÍS hafi sett reglur um vinnslu persónuupplýsinga sem ætlað sé að tryggja að starfsfólk VÍS vinni samkvæmt persónuverndarlögum og í samræmi við góða viðskiptahætti.

Starfsemi félagsins krefjist þess að meðhöndla þurfi mikið magn persónuupplýsinga, þ.m.t. viðkvæmar persónuupplýsingar. Mikil áhersla sé lögð á meðhöndlun og trúnað um persónuupplýsingar í starfseminni sem og við þjálfun starfsfólks. Strangar aðgangsstýringar séu að öllum persónuupplýsingum.