Ein á vaktinni og kemst ekki yfir allt

En þú þurftir að skila inn umsókn áður en Inga varð ráðherra.

„Ég er ekki með vaktmanneskju á styrkjavaktinni, er ein á skrifstofunni og kemst ekki yfir allt.“

Það er nú ekki eins og þú sért neinn nýgræðingur í þessu, búin að reka Fjölskylduhjálpina í 22 ár. Þú hlýtur að þekkja þetta styrkjafyrirkomulag?

„Ég hef fengið svo lítið af styrkjum frá hinu opinbera og oft fengið synjun, þannig að það hefur ekki verið efst á blaði hjá mér að fylgjast með styrkúthlutunum.“

Þú segist ekki hafa fengið mikið af styrkjum, en núna hótar þú að loka ef þú færð ekki styrk. „Ég er ekki að hóta neinu. Staðan er einfaldlega sú að við rekum starfsemina við mjög þröngar skorður og ég sé ekki fram úr því hvernig við eigum fyrir föstum kostnaði út þetta ár. Allur okkar búnaður er orðinn gamall og kominn á tíma. Ég stend frammi fyrir því að endurnýja búnað fyrir 20 milljónir á þessu ári og ég hef engin tök á að taka það út úr rekstrinum.“

Eftir ummæli félagsmálaráðherra í Morgunblaðinu í gær segist Ásgerður vona að Inga finni lausn. „Ef Inga vill leysa málið þá leysir hún málið. Hún er ráðherra. Að segja að það séu engir peningar til; ég blæs á það. Annað eins er nú bruðlað í stjórnkerfinu.“