Hýdd 100 sinnum fyrir kynlíf utan hjónabands

Karl og kona voru opinberlega hýdd hundrað sinnum hvort í Aceh-héraði í Indónesíu eftir að hafa verið fundin sek um að stunda kynlíf utan hjónabands.

Kynferðisleg sambönd milli ógiftra para eru ólögleg í héraðinu, sem framfylgir ströngum reglum samkvæmt íslamskri sharía-löggjöf.

Refsingin fór fram í almenningsgarði í höfuðborg héraðsins, Banda Aceh, þar sem parið var hýtt í lotum, tíu högg í senn, á meðan hópur fólks fylgdist með. Að sögn fréttaritara AFP, sem var á vettvangi, var konan hýdd af annarri konu.

Heilbrigðisþjónusta í viðbragðsstöðu

Þrír aðrir einstaklingar voru einnig hýddir á staðnum eftir að hafa verið sakfelldir fyrir að taka þátt í fjárhættuspili og neyta áfengis. 

Heilbrigðisþjónusta var til staðar á vettvangi og í viðbragðsstöðu, reiðubúin til að veita þeim dæmdu læknisaðstoð ef þurfa þætti.

Mannréttindasamtök hafa fordæmt þessa tegund refsingar, sem nýtur engu að síður talsverðs stuðnings meðal margra íbúa héraðsins og er beitt fyrir ýmiss konar brot.

Í febrúar voru tveir karlmenn hýddir opinberlega meira en 150 sinnum eftir að hafa verið sakfelldir fyrir samkynhneigt kynlíf, sem er einnig bannað í Aceh.

Skoðun á spýtum, sem gerðar eru úr bambus, og voru notaðar fer fram áður en refsingin er framkvæmd. AFP

• Blogga um frétt