Björgvin Franz æfði sig í 30 ár

Í nýju stórsýningunni Þetta er Laddi stígur leikarinn Björgvin Franz Gíslason á svið sem hin litríka Elsa Lund, hlutverk sem hann segist hafa undirbúið sig fyrir í meira en 30 ár og hefur nú verið tilnefndur til Grímuverðlaunanna fyrir leikinn.

Ást við fyrstu sýn 

Björgvin var aðeins tíu ára gamall þegar hann sá Elsu Lund verða til á heimili foreldra sinna, leikara­hjónanna Eddu Björgvinsdóttur og Gísla Rúnars Jónssonar. 

„Ég man eftir þeim niðri í kjallara að prófa gervi eða raddir og svo skrifa allt grínið niður jafnóðum,“ rifjar hann upp.

„Laddi var gjarnan á staðnum að vinna með þeim grínefni og ég gleymi aldrei þegar Elsa Lund mætti á svæðið: Guð minn góður, ég elskaði hana og ég fór strax að reyna að herma eftir henni.“

Björgvin var aðeins tíu ára gamall þegar hann sá fyrst Elsu Lund verða til. Ljósmynd/Borgarleikhúsið

Dreymt um hlutverkið í þrjátíu ár

Heimurinn fékk fyrstu sýn á Björgvin sem Elsa á grímubúningaballi 5. bekkjar Austurbæjarskóla.

„Í raun fékk ég svo mikla þráhyggju af Elsu að ég heimtaði að leika hana á grímubúningaballi 5. bekkjar í Austurbæjarskóla. Ég reddaði mér hárkollu, leðurjakka, gervitönnum frá mömmu og perlufesti hjá ömmu. Svo málaði ég fjólubláan augnskugga, mætti á svæðið og vann keppnina.“

Eftir þennan flutning var ekki aftur snúið og því mætti segja að Björgvin sé búinn að vera að undirbúa mig fyrir hlutverk Elsu í meira en 30 ár.

Björgvin lék Elsu Lund á grímubúningaballi 5. bekkjar í Austurbæjarskóla. Ljósmynd/Borgarleikhúsið

Hlutverkið fær lof og tilnefningu

Áralöng þráhyggja Björgvins skilaði sér þegar hann var nýverið tilnefndur til Grímuverðlauna sem leikari ársins í aukahlutverki fyrir túlkun sína á Elsu Lund. Leikritið Þetta er Laddi hlaut alls þrjár tilnefningar og verður sýnd áfram á stóra sviði Borgarleikhússins á vormisseri.

Þetta er Laddi verður sýnd áfram á Stóra sviði Borgarleikhússins á vormisseri. Ljósmynd/Borgarleikhúsið

• Blogga um frétt