Tekjutap upp á 6-7 milljarða króna

Þetta er meðal þess sem fram kom á kynningarfundi í húsakynnum Hafró í gær sem haldinn var vegna ráðgjafar stofnunarinnar um hámarksveiði fyrir næsta fiskveiðiár. Einnig kom fram að útlit væri fyrir að stofnstærð dragist saman næstu tvö til þrjú ár.

Stofnunin leggur jafnframt til 27% hækkun á aflamarki sumargotssíldar og 3% hækkun á aflamarki ýsu. Þá er lagt til að lækka aflamark ufsa um 11% og gullkarfa um 12%. Stofnunin heldur sig við þau tilmæli að engar veiðar verði stundaðar á djúpkarfa þar sem stofnunin metur hrygningarstofninn undir varúðarmörkum. Þá miðar ráðgjöf stofnunarinnar fyrir grálúðu við hækkun sem nemur um 17%.

Töluverður samdráttur

Samtök fyrirtækja í sjávarútvegi (SFS) hafa brugðist við ráðgjöf Hafró en samtökin áætla að miðað við 4% lækkun á milli fiskveiðiára verði þjóðarbúið af 6-7 milljörðum króna í útflutningstekjum. Þá er tekið fram í yfirlýsingunni að ráðlagður heildarafli þorsks hafi ekki verið lægri síðan á fiskveiðiárinu 2012/2013. Einnig benda samtökin á að þorskaflinn fiskveiðiárið 2019/2020 hafi verið 272.411 tonn eða 25% hærri en nú er lagt til. Ljóst er að samdráttur hefur verið töluverður og útlit er fyrir áframhaldandi ástand miðað við þá yfirlýsingu Hafró að stofnstærð muni dragast saman á næstu árum.

Þrátt fyrir vonbrigði SFS með ýmsa þætti ráðgjafarinnar ítreka þau í yfirlýsingu sinni að nauðsynlegt sé að fylgja ráðleggingum vísindamanna. Alþjóðlegar vottanir byggist á því að veiðar séu stundaðar á sjálfbæran hátt og þær grundvallist á vísindalegri ráðgjöf. Slíkar vottanir geri íslenskum fyrirtækjum kleift að selja vörur sínar um allan heim.

Líta rallið gagnrýnum augum

Arthur Bogason, formaður Landssambands smábátaeigenda, segir að ekkert í tilkynningu Hafró hafi komið mönnum sérstaklega á óvart. Hann segist þó líta aðferðir Hafrannsóknastofnunar gagnrýnum augum en hann telur að togararallið dugi ekki til að mæla stærð fiskistofna. „Við höfum kallað eftir því í áratugi að það sé fleira tekið inn í fiskveiðiráðgjöf heldur en magn,“ segir Arthur í samtali við Morgunblaðið. „Á sama tíma og Hafró hefur verið að skera niður, þá hefur dagsafli aukist hjá þessum bátum sem nota veigaminnstu veiðarfærin og er dreift hringinn í kringum landið. Það er fyllilega ástæða til þess að skoða samhengi þess betur.“

Þá segir Arthur að sambandið hafi lengi óskað eftir því að Hafró veiti sérstaka veiðarfæraráðgjöf. „Svo held ég að það hljóti nú að fara að renna tvær grímur á ýmsa sem hafa þverskallast við þessu þegar meiri og meiri upplýsingar eru að koma í ljós um að það er hægt að ganga af meiri nærgætni um auðlindina heldur en með risastórum togvörpum.“