Þorsteinn Már lætur af störfum

Þorsteinn Már Baldvinsson forstjóri Samherja hefur tilkynnt afsögn sína sem forstjóri félagsins en hann lætur af störfum í júní. Þetta kemur fram í opnu bréfi sem Þorsteinn sendi á starfsfólk Samherja.

„Ég hef tekið ákvörðun um að láta af störfum sem forstjóri Samherja hf. eftir að hafa gegnt því starfi í 42 ár eða frá stofnun félagsins árið 1983. Starfslok verða í næsta mánuði,“ segir í bréfinu.

Einnig kemur fram að stjórn félagsins hafi gengið frá ráðningu Baldvins Þorsteinssonar í stöðu forstjóra. Baldvin er jafnframt einn stærsti hluthafi Samherja og núverandi stjórnarformaður.

„Ég ákvað fyrir löngu að hætta á mínum forsendum áður en ég yrði gamall og leiðinlegur. Allt hefur sinn tíma og mér finnst þessi tímasetning rétt,“ segir Þorsteinn Már, sem lýsir djúpu þakklæti til starfsfólks Samherja og stofnenda félagsins.

Samherji hefur á þessum tíma vaxið úr útgerð með einum togara yfir í eitt stærsta sjávarútvegsfyrirtæki landsins, með fjölbreytta starfsemi og yfir 800 starfsmenn. Þorsteinn Már mun áfram gegna stjórnunarhlutverkum, meðal annars hjá Samherja fiskeldi og Síldarvinnslunni hf.

• Blogga um frétt