Stoppa vegna öryggis

Fara yfir stoppsögur

Hann segir að þegar einhver stoppar vinnu sé það skráð í þar til gert kerfi. Á hverjum morgni fari vakthópar og öll framkvæmdarstjórnin yfir stoppsögur frá hverju framleiðslusvæði frá því deginum áður. „Ég vil fullvissa fólkið um að það hafi allan minn stuðning til að stoppa vinnu í svona tilvikum. Það skiptir máli að hvetja fólkið áfram þannig að það upplifi að þetta sé fullkomlega eðlilegt. Við ítrekum þessa reglu á hverjum einasta degi.“

Önnur breyting í starfseminni eru daglegir fundir framkvæmdastjórnar þar sem áhersluatriði hvers dags eru rædd. Þetta hefur að sögn Costa skerpt á aganum í vinnubrögðum innanhúss. „Fundirnir skila miklum árangri.“

Allir út á gólf

Enn önnur nýjung sem innleidd var í fyrra er að á hverjum degi ver hver einasti framkvæmdastjóri einni klukkustund á verksmiðjugólfinu, þar á meðal forstjórinn sjálfur. „Við ræðum við fólk, svörum spurningum og fáum viðbrögð og góðar ábendingar til baka. Þetta er mikilvægt fyrir öryggið og stöðuleikann og undirstrikar að við erum öll eitt samhent lið.“

Þróun fólks í starfi er ríkur þáttur í menningu Alcoa. Ýmsir starfsmenn sem byrjuðu í Fjarðaáli vinna nú t.d. hjá móðurfélaginu, Alcoa, að sögn Costa. Þá rekur fyrirtækið stóriðjuskóla og fær starfsfólk 5% launahækkun við útskrift. „41 útskrifaðist í fyrra. Fólk bætir við þekkingu sína og kemur öruggara inn í starfið.“