Heimar ljúka kaupum á Grósku og Gróðurhúsinu

Fasteignafélagið Heimar hf. hefur nú formlega lokið kaupum á öllu hlutafé í Grósku ehf. og Gróðurhúsinu ehf., samkvæmt tilkynningu til Kauphallarinnar í dag. Um er að ræða eignina Grósku að Bjargargötu 1 í Reykjavík, sem talin er ein stærsta og metnaðarfyllsta skrifstofubygging landsins.

Gróðurhúsið ehf. rekur sprotasetur og vinnurými í fasteigninni, sem er BREEAM umhverfisvottuð. Með kaupunum hækkar hlutfall vottaðra eigna í eignasafni Heima úr 38,9% í 41,1%.

Kaupverðið var greitt með útgáfu og afhendingu 258 milljóna nýrra hluta í Heima, sem hafa verið teknir til viðskipta hjá Nasdaq Iceland.

Samhliða viðskiptunum mun fjárfestingarfélagið Omega ehf. kaupa hlut Björgólfs Thors Björgólfssonar og verða eftir það stærsti hluthafi Heima með liðlega 12,5% hlut.

„Gróska er einstök bygging sem státar af öflugu samfélagi nýsköpunar og skapandi greina og sómir sér afar vel í okkar eignasafni. Staðsetningin á Háskólasvæðinu, stærð og hönnun hússins, auk nálægðar við miðborgina, mun að okkar mati styðja við stöðuga eftirspurn leigutaka eftir skrifstofum og öðru atvinnuhúsnæði í Grósku til langrar framtíðar,“ segir Halldór Benjamín Þorbergsson, forstjóri Heima, í tilkynningunni.

Birgir Már Ragnarsson, stjórnarformaður Grósku og meðeigandi Omega ehf., segir söluna marka tímamót í sögu Grósku:

„Svona metnaðarfullt hús verðskuldar öflugan eiganda sem hefur burði til að halda þróuninni áfram. Heimar eru öflugasta fasteignafélag landsins með flotta framtíðarsýn og í mínum huga rétti aðilinn til að taka við rekstri Grósku. Framtíðin er björt.“

• Blogga um frétt