Þyrlan kölluð til vegna hrakins göngumanns

Þyrla Landhelgisgæslunnar var kölluð út rétt fyrir klukkan 13 í dag vegna göngumanns sem var í sjálfheldu í um 1.300 metra hæð í fjallinu Bónda skammt frá Hrafnagili. Maðurinn var orðinn kaldur og hrakinn. 

Þetta segir Ásgeir Erlendsson, upplýsingafulltrúi Landhelgisgæslunnar, í samtali við mbl.is. 

Ásgeir segir að þyrlusveit gæslunnar hafi verið stödd á Akureyri þegar útkallið barst til að taka þátt á flugdeginum sem fer þar fram í dag. 

Þyrlan er um þessar mundir stödd á Akureyrarflugvelli þar sem hún undirbýr sig fyrir útkallið.

Aðspurður segir Ásgeir að ekki liggi fyrir hvort maðurinn þurfi á læknisaðstoð að halda.

• Blogga um frétt